Zyrtari korrektues Alban Haziri shpallet ndër sportistët më të dalluar në Kosovë.

Gjatë ditës së sotme ai është pritur nga Drejtori i Përgjithshëm i Shërbimit Korrektues të Kosovës, Ismail Dibrani, për ta uruar për suksesin e tij të fundit sportiv, ku është shpallur ndër sportistët më të dalluar në vend.

Gjatë takimit u vlerësuan angazhimi profesional dhe arritjet sportive të Hazirit, të cilat përfaqësojnë në mënyrë dinjitoze vendin dhe rrjedhimisht edhe Shërbimin Korrektues të Kosovës.

Në shenjë nderimi, Haziri i dhuroi Drejtorit Dibrani një fanellë, ndërsa drejtori i dhuroi një medalje dhe mirënjohjeje, duke i uruar suksese të mëtejshme në karrierën sportive.

Alban Haziri është shpallur dy vite me radhë hendbollisti i vitit në Kosovë, një vlerësim që pasqyron përkushtimin, disiplinën dhe seriozitetin e tij si në detyrë ashtu edhe në sport.

Përveç punës si oficer korrektues, ai është edhe përfaqësues i rregullt i Kombëtares së Kosovës në hendboll, ku vazhdimisht ka treguar nivel të lartë sportiv dhe profesional.

Në nivel klubesh, Haziri ka arritur suksese të rëndësishme, duke u shpallur Kampion i Kosovës dy vite radhazi, në vitet 2024 dhe 2025, si dhe fitues i Kupës së Kosovës.